【本報訊】羊年臨近，年廿八，洗邋遢；有拍賣行負責人提醒巿民，若大掃除時在家中枱底暗角，發現一些五仙「神沙」要留意年份，隨時升值變「大牛」。本周末拍賣的「一九六四年香港五仙」拍賣底價五百元，「一九八○年香港一毫」底價四百元，「呢個只係大約巿價，經叫價分分鐘唔止呢個數。」
記者：蔡朗清

普藝拍賣行錢幣部主管梁達榮昨表示，錢幣收藏家競相追逐的香港輔幣主要是兩種，其中是一九八○年的一毫，如果是全新硬幣，現巿價高達逾千元，升值一萬倍；即使用過，只要硬幣整體表面沒有刮花，色澤光鮮，亦可賣得四至五百元。
一九八○年一毫是香港最後一款大面積的一毫硬幣，之後全部硬幣都變得輕巧細緻，所以變得值錢，「政府當年全面回收一九八○年一毫，巿面流通量唔多。即使係一九八○年前的一毫都唔值錢」。

無人知市面有幾多枚

梁達榮續稱，一九六四年香港五仙硬幣更值錢，拿去拍賣行保守估計可賣得八百元，升值逾萬倍；保存良好隨時拍得二千元，「點解一九六四年香港五仙咁值錢？其他年份唔值錢，因為其他硬幣都有發行量，惟獨一九六四年五仙無公佈發行量，到今天都係一個謎，巿面仲有幾多枚，冇人知。咁樣先值錢」。
他說，普藝本周末錢幣拍賣行各有一枚一九六四年香港五仙及一九八○年香港一毫拍賣，底價分別是五百元及四百元，「最後成交價幾多？好難估計」。
除硬幣外，當日亦有鈔票拍賣，其中一組二百張連編號的全新滙豐銀行拾圓，底價三千二百元，「係一九九二年鈔票，賣家當年喺銀行『唱』返嚟諗住封利是，點知擺係保險箱到𠵱家。值錢在於連號碼加上靚冧巴，頭三個號碼是888，有一張仲係888777。𠵱家已經無連號碼鈔票換」。
另一張拍品是一九八一年全新滙豐銀行一百元，編號555555 ZF，估值四千二百元。
梁達榮打趣說，巿民在大掃除找得有關輔幣等，不妨拿來拍賣行估價，「我哋會盡快幫賣家安排拍賣」。