曹仁超—投資者日記 投資精髓

24/05/10

世上没有赢梗的投资

投资者常犯错误：

1。　投资ABC股赢梗。世上没有一项投资可以赢梗；愈是「热门股」，愈代表该股「overvalued」。在过度超买时吸纳，如何赚钱？例如 1997年上海实业（363）、北控（392）连上市申请表格亦炒到500元一张。2000年TOM仔上市，连纹身大只佬都到旺角汇丰银行排队。

2。　好多人质疑市况太差，点买股票？生于忧患，死于逸乐。事后往往证明在市况差时，才是买股票好时机。

3。　大行推介跑赢大市？事实证明由有名气大行管理的投资组合，大部分均跑输大市。请看看金融海啸中所谓大行的投资组合表现如何？

4。　分散投资可逃避风险。事实证明持有五十只劣质股不如持有一只优质股。分散投资只是分散自己的注意力。

5。　许多人有1万元赚而急急获利。结果赢粒糖、输间厂。如你的投资刚上升10％，应该进一步买入而非获利回吐。千万不要为眼前1万元利润而放弃未来赚大钱的机会。

如要投资成功：A。　自己作决定，不要盲目相信投资专家或股票经纪。B。　学习管钱。C。　大部分离岸产品皆没有投资价值，但有少数例外。D。　大 部分结构性产品皆隐藏风险，如自己不了解少沾手为佳。E。　不要期望证监可以保护你，证监的作用有如jc（贼过之后，jc才出现），在你被打劫之时，jc 往往不知在何方。F。　不作投资不会死人，盲目投资却可以死人。

25/05/09

以下十种有效工具，有助初学趋势投资法嘅读者：

一、每次升市领袖股都唔同。例如1998至2000年科网股，2003至2007年系国企股。如抱住过气领袖股不放，处境有如2009年5月嘅电盈（008）小股东。

二、创五十二周新高价嘅股份，通常可进一步睇好。

三、10天线同50天线系有用嘅trading工具。如10天线重返50天线之上，即短期内股价仍上升；反之如10天线跌穿50天线，都系小心D好。

四、二线股份出现连续强势数星期但指数却唔上升，小心调整市好快出现。

五、公布业绩后股价如上升10％（或以上），代表跌市方向改变；如公布业绩后股价急跌20％（或以上），亦代表上升方向已改变。

六、一隻股份大升后出现窄幅牛皮（例如喺10％内），代表另一次较大升幅将再出现。

七、拆细通常代表股价快见顶，合併代表股价快见底。拆细代表企业大股东欲出货，合併代表企业大股东欲收集。

八、大企业股价喺恶劣环境下可迅速回落。最愚蠢嘅投资系喺恶劣环境下买大企业股份〔最近例子例如喺2008年买滙控（005）〕。

九、股价走在消息之前三到六个月。唔好听消息去决定买卖，请追随趋势而非走势。利用timing买卖投资项目，而非评估该股嘅「价值」系多少。

十、响牛市中每次跌穿250天移动平均线乃入货讯号；喺熊市中每次升穿250天移动平均线系出货讯号。250天线唔系牛熊分界线；「黄金交叉」或「死亡交叉」乃用作印证牛市或熊市出现及死亡（準确度达93％）。牛熊观念来自道氏理论，相当复杂，并非一般人所讲咁简单。

2008年系最多投资者由价值投资法过渡到趋势投资法嘅一年（或叫Earnings Momentum Investing）。投资者再唔计较股票系咪「物有所值」，改為分析未来企业纯利前景，而决定现存趋势（trends）能否继续落去。简单D讲：一、该股未来一年纯利能否上升25％或以上？二、该公司有冇新產品或新服务，支持未来纯利上升？三、该股股价系咪较最低价最少上升25％？四、喺行业中系带头者抑或落后者？五、后市点睇？因75％股价升降受大市升降影响。



18/09/08
高盛经济学家简哈祖斯估计，旧年金融机构拨备8058亿元同埋集资3670亿美元，仍然唔足够。因为去杠杆化（ deleveraging ）已经开始，情况比九十年代初期储蓄和贷款亏损仲要大。好似美国国际集团今年6月30日止涉及慨的CDS金额高达4460亿美元，今年下半年亏损几多？联储局旧年有8000亿美元国库券，上周为止只剩低4800亿美元，其中2000亿美元已用作“有条件证券抵押” ，真正即时能够动用资金系2800亿元，今个礼拜再拨出850亿美元去挽救美国国际集团，即系家吓联储局可动用资金少于2000亿元。今个礼拜再向市场注资1000亿美元，即系下个礼拜开始联储局可动用资金已经唔足1000亿元，面对63万亿美元市值慨的CDS ， 1000亿美元可以做到D乜？从呢点睇局面只系暂时稳定落嚟，问题仍未彻底解决。



28/08/08
有读者打电话嚟问反弹同当头起有羊分别？
一、当头起升幅最少20%；
二、一浪高於一浪（即喺次低点才入市）；
三、50天移动平均线重返250天线之上；
四、当头起喺熊三出现后先出现（熊三P/E喺八至十二倍之间）。

利用上述几点分析依家嘅形势仍系熊二（因恒指P/E喺十二倍之上），理论上只有反弹而冇上升。客观形势系美国房地產状况喺度转坏紧。去年系防危机年，今年系小心谨慎年。



18/06/08

火冇氧氣便無法燃燒，泡沫冇流動性過剩亦脹唔起。金融信貸市場膨脹，大量信用被創造出來，支持泡沫一個接一個形成、膨脹及爆破，此乃格蛇上台後金融市場現象。　　

其次係「非理性亢奮」（Euphoria）出現，例如1989年「日本第一」論（日本人以為自己係全球第一）。去年10月港股直通車消息，將內地2008年8月北京奧運前過度樂觀、過分自信、過分高估前景而低估風險氣氛引入香港，即俗語所講「high high地！」都係泡沫爆破前現象，產生過度槓桿（over-leverage），一旦爆破，短期回落趨勢無法阻止。結束期，往往係投資者唔肯再參與而令成交萎縮。先「寧靜」才能「致遠」，即泡沫結束期股市將十分寧靜，進入寧靜期之前則必然有多次反彈，叫做牛陷阱（Bull traps）。狂牛往往極度熱鬧時死亡，而巨熊死前則好寧靜。



18/04/08

要喺投資市場賺錢，除咗須學曉good stock picks及time the market外，仲要嚴守紀律（止蝕唔止賺）。喺熊市一期，二線股跌幅最大；喺熊市二期，二線股反彈最乏力；但到熊市三期，二線股反而跌幅最細。喺熊市一期，大價股抗跌力最強；喺熊市二期，大價股反彈力最好；但到咗熊市三期，大價股跌幅反而最大。換言之，要到大價股急跌而二線股唔跌（或小跌），才係熊市三期，估計响今年第四季或明年第一季才出現。



15/03/08

投資策略可分為三大類：一、Value Investor。經深入了解基本因素後，挑選最值得投資企業，然後長線持有。二、Growth Investor。追求高增長，找尋明白之星，呢方面風險較大，不過一旦買中，利潤極之可觀。第三類係學momentum技巧。利用技術分析，捕捉大市高低點。



13/03/08

去年11月至今年1月只係完成熊市第一期（獲利回吐期），之後係熊市第二期（炒上落市），最後才係熊市第三期（惡性拋售）。熊市二期一般較熊市一期長（即唔止三個月）。



18/02/2008

投資策略已改為點樣熊市中獲利，首先要改變係自己邏輯思維。例如從熊市角度睇大勢而唔再係牛市角度。牛市中，每次回落皆係技術調整，宜吸納；反之，熊市中每次反彈係技術調整，宜減持。牛市中，壞消息係入貨訊號；熊市中，好消息係出貨訊號（雖然恒生指數仍未確認熊市，根據滯後效應，一旦美股確認熊市，港股進入熊市只係時間問題）。「Think like a bear」，講就易，做就難



01/02/2008

智者看其因，愚者看其果；聰明人研究點解別人會發達，愚蠢人羨慕別人發達。如你因熊市而唔投資，你便較別人慢30％（因股票市場有30％時間係熊市）。正確態度係應收起牛心態，改用熊心態，例如首重保本，次而捕捉逆市之升（星），最高層次係玩Put甚至玩期指（必須非常專業）。


28/01/2008

留意趨勢改變，才能了解市場方向。如冇基礎分析、市場心理學做背景，單憑技術分析，成功機會有幾大？我老曹未見過一個富翁係走勢派信徒。換言之，走勢只能用作輔助，不應作為主要分析工具。走勢最好用作確認自己分析趨勢方向係咪正確。The trend is your best friend, not chart！


07/01/2008

高盛估計，2015年中國GDP將超過日本，2041年後過埋美國，成為全球最大經濟實體。印度將2032年超過日本，成為全球第二大經濟實體。四十年內金磚國GDP將超過七大工業國（OECD）；二十年內金磚國內將有二億人口人均收入超過1.5萬美元，相等於整個西歐（法國、德國、意大利同英國加起來）。戰後意大利、法國、英國工業走向沒落，地位被日本及亞洲四小龍取代；今天日本同亞洲四小龍工業地位又被新興工業國（尤其中國同印度）取代。上述報告唔係2007年寫成，而係2003年，過去五年已證明正確，相信未來二十年亦都正確。成長過程中難免出現困難，但長遠睇仍樂觀。以周期睇，2008年係四大金磚國進入青黃不接期，經濟可能出現短期調整，但不應退出，反而係進入四大金磚國良好機會。


03/01/2008

- 專業如畢非德手上永遠有現金,（已故新地主席郭得勝老先生教落：三七分──即睇好時七成貨、三成現金；睇淡時三成貨、七成現金.

- 記住止蝕唔止賺，每次將虧損局限15％至20％，讓利潤往前跑乃投資必守戒條。專業投資者係計算自己可以輸幾多，而非自己應該賺幾多。

- 改善投資回報十大要訣　　

2008年如何改善你投資回報？

一、股市權威說話可聽不可信，聽完佢地說話後，記得返屋企做功課，唔好盲目相信。

二、Trading唔係投資。Trading同投資股票唔同，你並冇擁有該公司，只希望價位上落中獲利，因此唔好將唔成功trading變成投資，請嚴守止蝕。

三、勝敗乃兵家常事，蝕本離場有何可恥？唔係每單trade都要賺錢離場。

四、唔好望打和、唔好追落後，溝上唔溝落。Trading有虧損便應止蝕離場，然後重新再開始。

五、世上冇必勝投資，嚴守紀律者才可輸少贏多。

六、唔好追隨群眾，佢地常常犯錯。人人都知所謂好消息，本身已係壞消息（Too good to be true!）。

七、唔好忽略警告訊號，唔好等沉船時才去搵救生艇。

八、未離場前唔好計自己賺幾多。

九、炒股票唔似打工，不應月月出糧，一年做兩、三單大deal已足夠。

十、EYF（享受你失敗）。失敗係最好老師。不如意事十常八九，十單買賣中八、九單蝕本亦唔奇，只要一兩單贏得十分大便可。Trading唔係周末度假團，而係漱口、洗面、擦牙，必須天天關注才做得好。

最出色trader已唔使睇圖表，而係靠本能反應，你已做到咩？




27/12/2007

- pick the good stocks at good times and staying with them as long as they remain good companies！

- 四十多年前巴郡只係一間紡織廠，年賺4.5萬美元。畢非德獲控制權後將紡織廠關掉，資金用作投資一間保險公司GEICO，年賺460萬美元，即一下子令巴郡純利上升十倍！保險公司賺回來錢用作收購時思糖果（See's Candies），係一間生產朱古力、賺錢能力好強公司；再將賺回來錢用作吸納可口可樂。可口可樂派息用作購買美國運通，然後吉列刀片……。結果巴郡股價上升5576％，最近十年亦上升482％。乜令巴郡股價上升？答案係純利增長。2000年至今道指升幅有限，但石油股、能源股、金礦股及資源股平均上升401％（高潮2006年），同期巴郡升幅亦只有100％。換言之，所謂Midas Touch就係找出邊D公司未來純利可大升，就係咁簡單。



21/12/2007

明年投資策略：保本為主，增值為次。揀股為主，唔好過分注重timing。唔好聽信謠言，多做功課──分析個別股份而非猜測股市方向，唔識則最好唔做。　　值得注意係，羅素二千指數（細價股指數）上升軌失守【圖二】，即唔止大企業股價紛紛見頂二線股亦唔例外。2005年7月開始細價股上升潮會否亦告一段落？睇明年認真搵食艱難。



20/12/2007

追隨趨勢，尋找D純利進入高增長期股份，才係最佳投資策略。股市內悲劇係大部分投資者皆忽略趨勢，只睇走勢，往往賺粒糖、輸間廠。2008年做個trend-rider及earning-seeker。



14/12/2007

根據吳起兵法：一戰而勝之兵乃勤於操練之兵；二戰而勝之兵乃最可用之兵（已有一定經驗）；三戰而勝之兵乃驕兵，小心驕兵必敗；四戰而勝之兵，乃應解甲歸田之兵；五戰而勝之兵，乃一敗塗地之兵。

2004年我老曹初試牛刀，利用牛眼投資法選股，過去四年成績不俗，大部分回報率超過100％。今年我老曹已係四戰而勝之兵，明年應否歸甲解田，以免勝利沖昏頭腦而一敗塗地？所謂用兵之道兵貴神速，速戰速決，有機會便全力進軍，最短時間內賺取最大利潤，然後又頭岳岳。


投資二線股，嚴格D講一年已太長，將目光放三至六個月後，即每次投資目標係三至六個月內賺取50-100％回報。利用行業分析（Asset and Sector Allocation Model）作為找尋投資項目，更深一層分析可用Comparison Model去分析行業內邊D股份最好（未必每次都係龍頭股）。上述投資法叫做Target investment，無論牛熊市都適用，目的係三到六個月內追求50％到100％回報。




10/12/2007

今年另一成功策略就係「牛眼投資法」，發明者係John Mauldin，並2004年出書推介。我老曹係最先向香港讀者推介呢個方法作者，並由2004年起採用佢方法。利用牛眼投資法係每年追求「三位數字」（即100％）或以上回報。牛眼投資法第一步係「Invest like a venture capitalist」，即專攻二線股，事前做足搜集工夫，搵出邊D行業正進入起飛期或轉虧為盈期。牛眼投資法較適合散戶採用，但必須自己做足功課，千萬不可跟我老曹買，因為專家如David Webb 去年聖誕前推介股份，今年恒生指數大升40％環境下仍跌27％；世上並冇必殺技也！作為venture capitalist，就係當一間企業開始轉虧為盈時立即介入，而非等到人人叫好時才介入。Early bird catches the worms，又或者投資D引入創新意念企業，最典型例子係呢幾年蘋果引入iPod後再引入iPhone，令蘋果股價由5美元升上180美元！



08/12/2007

投資者重保本接受低利率　　

我老曹經歷咁多，能夠學到，就係無論發生乜事，保持頭腦冷靜最重要，其次係sustain power。1974年雖然損失慘重，但仍有10萬元資產在手，可以生存落去；1982至84年已懂得唔去盡好處，守得雲開見月明；1987年學曉逃避風險，其餘1993、97及2000年皆巧妙地避過。好好控制自己的貪婪及恐懼感，唔少金融危機其實係可以逃避，例如1987年股災前期指炒賣、1997年前樓市瘋狂表現、2000年非理性科網股泡沫。面對A股熱潮引發H股9月、10月狂升，只要唔太貪，問題唔大。至於美國次按危機去年下半年已浮現，只係一般人視而不見，估計重整需時（例如兩到四年），只要避開，問題亦唔大。次按危機對全球金融市場影響係點？有待觀察，相信最終可解決。展望明年全球經濟再次陷入滯脹期，股市將上落數番，並出現大量Deep V。今天二年期債券孳息率只有2.9厘，重返2004年6月聯儲局開始加息期水平（當年聯邦基金利率只有1厘）；十年期債券亦只有3.9厘，係2004年3月以來最低！點解投資者願意接受咁低利率？代表保本愈來愈重要也！



13/11/07

今年9月中出版《論勢》最近第八版已出售，反應之佳出乎我老曹意料，不但如此，亦獲唔少同業好評。我老曹在此多謝各位同業，亦不妨同大家分享一下自己心路歷程。我老曹活到今天快六十歲，對未來已唔再抱幻想，好多事物已經歷過，進入淡然以對心情（可以講衰已衰過，威亦威過）。我老曹今天一把年紀，仍常問自己：人生意義係乜？依家心境雖然平靜，卻未能忘懷少年時喪父之痛，種挫折感真係一生難忘。經過四十年努力，財富上獲得良多，回首其他方面失去更多。眼見詹瑞文兄同女兒快樂相處，撫心自問，我老曹兒女成長過程大部分由太太負責，佢地擁有只係一個工作狂爸爸；幸好太太體諒，我老曹今天仍有一個快樂家庭，唔少朋友事業成功，換可能只係一個破碎家庭。相信係我老曹少年時貧窮，造成自己追求財富性格。《論勢》一書出版目的，唔係教各位多D搵錢方法，而係希望讀者追求財富與快樂人生之間，達致一個平衡點。做個富爸爸同時做個笑爸爸，令自己下一代自己歡笑中成長。財富易得，快樂難求，希望大家不但搵到財富，同時搵到快樂。


25/10/2007

小投資者常犯錯誤：　　

一、睇市唔睇股。
8月17日至今恒生指數已上升50％，主因係8月20日中央宣布批准港股直通車，令中字派股份價格上升100％。呢段日子，唔少股份卻毫無升幅可言（甚至回落）；我老曹講十年以上炒股唔睇市，但仍然有咁多人犯錯。　　

二、唔理會宏觀經濟。例如1984年中英聯合聲明「草簽」中講明限制香港政府每年賣地五十公頃到1997年6月30日止。呢段日子，本港地價、樓價大升，但好多人卻唔曉投資房地產；到1997年7月1日「八萬五」政策出台，更加多人唔識避。2003年9月「孫九招」面世，好多人仍然問後市樓價點睇？2007年開始，美國有七千七百萬人按年進入六十五歲退休期，佔總人口25％，好多人仍然唔信美股2007年見頂（一如1990年唔信日股見頂一樣）。　　

三、泡沫形成初期散戶怕得要死，泡沫維持一段日子後，散戶卻忘記風險。大部分泡沫由形成到爆破通常歷時三年（例如1998年科網股，到2000年3月爆破）。內地A股由2005年年中開始上升，2007年下半年亦踏入第三年，即係已進入令人擔心時刻。我老曹亦曾犯過呢D錯誤，例如1973年1月恒指見1200點已睇淡，結果三個月內恒指升上1700點，即再升50％。1974年7月恒指見450點便睇好，但大市再跌多半年，1974年12月跌至150點才改變方向。太早睇淡或太早睇好都係死罪，Timing is everything。　　

四、不分行業全面睇好或睇淡。例如能源、金融、製造業、地產、航運業、原材料、資訊科技業，唔同行業有本身盛衰循環周期，不應一概而論。2003年至今地產、金融、能源、航運等行業表現不俗，但製造業卻在叫救命！2007年7月1日前後，中央政府取消大量產品出口退稅，鋼鐵股、鋁業股等應受打擊。　　

五、人云亦云，欠缺獨立思考能力，忘記20╱80定律（社會上只有20％人口成功）。如果你睇法獲得唔少朋友支持，請放棄。因為贏家永遠係少數。


09/10/07
因此只有熊市將盡時才投資藍籌股，因為可提供100％利潤機會；牛市將盡時，例如家便改為70％現金，30％投資細價股，因為只有細價股才可提供100％或以上利潤機會.


05/10/07
唔係所有二線股都可以快高長大成為明日藍籌股，因此必須嚴守止蝕唔止賺策略。可以改變你一生命運係二線股（明日藍籌股），唔係今天藍籌股，策略係「狠、忍、準」，一旦睇得準，便要忍，一如鯊魚（死咬住唔放）般狠！


呢個世界有兩類投資法：第一類叫Value Investing (價值投資法）﹐投資者努力找尋偏低股份，或熊市將完成時入市，耐心等候股價重返合理水平，或牛市將盡時獲利回吐。第二類係搵Growth Stock 即找尋增長股，搵出邊D股份未來幾年每年純利可上升25％或以上，透過企業增長而令股價大幅上升。1997年7月前香港經濟處於高增長期（1967至97年黃金三十年），股票市場內充滿增長股。1997年後香港大部分股份變成價值股（Value Stock），即利用行業盛衰產生一起一落從中獲利


賺錢只係一種技能，透過學習再獲得，而非乜天分。只要有足夠動力，加上一定的努力便可獲得。賺錢主要透過智慧而非勤力，例如在每一次失敗經驗中吸取精華，重新站起來再嘗試，唔需要特別聰明或特別勤奮甚至特別幸運。例如你有冇耐性等候一個機會出現？有冇學曉止蝕唔止賺？或靜靜地等候財富自動增加？


我老曹運用移動平均數已有35年歷史。我老曹一再強調，移動平均線理論中並冇牛、熊市，牛、熊市係根據道氏理論，即牛市分三期、熊市分三期，呢個已係1900年前理論，近代已被人一再質疑。現代經濟咁複雜，股市係咪仲存在牛、熊市？大量國企來港上市後，本港股市對房地產依賴漸減，牛、熊市理論係咪仲有價值？過去35年我老曹研究移動平均線經驗係：

A、牛市一期恒生指數唔會跌穿250天線。
B、牛市二期恒生指數經常跌穿250天線，每次跌穿250天移動平均線不但唔係出貨訊號，反而係入貨訊號。
C、只有牛市三期恒生指數跌穿250天線，才係牛市死亡訊號。
結合道氏理論如下：
A、牛市一期O8至12倍時，恒指應唔會跌穿 250天線。
B、牛市二期O12到16倍，恒指跌穿250天線係入貨訊號。
C、牛市三期O18到22倍，跌穿250天線才應小心。
1997年8月同2000年3月恒指O都22倍以上，牛市三期十分明顯。2003年4月恒指回升至今，未見O22倍以上（反之，國企指數已在22倍之上，國企股已進入牛市三期，即瘋狂上升期，開始唱《夕陽之歌》）。後市展望，股市繼續swings，投資策略係：你驚我唔驚，你唔驚我驚。